Mestra en Serantes até 2002, Lucía Atencia vive desde hai dous anos no Gaeltacht de Ciarraí, onde se converteu en falante de irlandés. Hai case catro anos empezou a estudalo. "Empecei facendo cursos como os de Gael Linn e Gael Chultúr en Dublín, e logo vindo a Ciarraí no verán. Logo entereime de que había un Gaeltacht en Meath e mudeime a vivir alí, aínda que me levaba unha hora e media todas as mañás chegar ao traballo en Dublín", explica. "Cando decidín mudarme a Ciarraí xa se pode dicir que tiña bastante fluidez".